معاينة كمساري

معاينة كمساري

البعدووووووووووو, مناديا السواق على الصف الطويل بالخارجكمساري

السلااااام عليكم يا معلم, معاك اب شيبة حمد محمود حمدي المشهور بالجرقندي

السواق سائلا: عرفت بالوظيفة دي كيف يا الجرقندي؟

الكمسنجية قالوا عايز ليك بلف للبقرة دي* (1) فقلت أخير نشتغل معاك و كدا

طيب يااا إبني: انت أشتغلت في كم خط قبل كدا ؟

يا عمك نحن جواكر اي خط حافظنوا في راسنا .. كان علي الحج يوسيف اشتغلنا كان ام درمانات مشينا, يا أصلي نحن اللفة مشيناها بي كبري المنشية و الثورة بالنص جيناها بي شرق و كان ما متنا شقينا المقابر

خلاس خلاس خلاس

اها عندك رخصة؟
صغيرة يا معلم لكين تلاته شهور بس و تطلع الكبيرة

اها قضيت الخدمة الوظنية؟
كييييف سنة خبرة في باص الوالي …. الجماعة ديل بي هناك كلهم فردي

ليه خليتهم؟
والله يا عمك قروشم دي تقول ما معروف فيها شنو تجي بي جاي تمشي بي جاي … بعدين أخوك ما عندوا ضهر فقص  لي واحد من الجماعة كدا 😦  و منها فكيتهم عكس الهوا

 الأسئلة العلمية

طبعا أهم حاجة المواعيد فالشغل عندنا ببدا الساعة 5 و نص صباحاً.. فياتوا فردة حتشيلا ذي المواعيد دي؟

الأقرب للعربي و ركابا كتيرين.. و غالبا دي بتكون خطوط الخرطوم الداخلية ذي الصينية و شرق و كدا

جميل جمبل جميل

ناخد خط الحج يوسيف كمثال, حنمشيهوا بي وين من العربي؟

شوف يا معلم, تمشي جم محل ناس المعرض و بري و انا برفعهم ليك علي حسابات الحج يوسف

بدفعوا ديل ما تخاف مرطبيييييين 

نازال طالع نازل طالع نازال طالع نازل طالع

اتخارجت منهم… لفها بي الكبري بتاع كوبر ولا الجديد, المهم قبل الكبري بنجازف ناس و تحتوا بنجازف الباقي و نكملا لحدي الوحدة السوق جوة

اها بعد نصل؟

نضايق الرقاشة و نخمها الردمية ولا شارع واحد و نرجع بيها الزلط بعد داك

اها بعد كدا بعد الساعة اربعة مسا تمشي وين؟

منها يا معلم لو داير الزيييييت الجد .. أقلبا مايوا , المكنيكيا و الصنايعية زي المواعيد دي كلهم برجعوا … تشحن لمن تشبع

نص القيمة

طيب يا الجرق*، ما هي مراحل التهرب من الطلاب؟

طيعاً الوقاية خير من العلاج. فأول حاجة ما نركبهم أصلاً.
ناس الرباط ديل ظاهربن خليهم علي انا … لكين الباقين ديل الا نستعمل نظرية الدفاع بالنظر!!! هههه

اها لو فرضنا واحد ركب و ما عرفتوا تعمل شنو؟

كدي خليني أكمل ليك يا معلم …. ماااااا تقاظعني ياخ “نظام الكمساري عندوا شخصية و كدا” هههه

المرحلة التانية, تصعب عليهم عملية الوصول لي كنبة شكرا… فأي زول كبير و شكلوا مرطب و برجوازي كدا طوالى نركبوا ورا
المرحلة البعدها طبعا لو ما قاعد في كنية شكرا حتى لو بطاقة بجازفا منو
بعد داك نسأل من البطاقة و الماعندوا … الله معاو هههههههه

بعد البطاقة لو أداني صمة بجازف منو بالحنك

لو اداني فكة و قفلا معانا بعد دا الا ناكلا في حنانا و نتوكل بس

كؤيس كويس كويس يا ابني

الحافلة ملانا تف .. لكين مافي شماعة … نعمل شنو شان نكسب زيادة ناس في المحطة الجاية

انا بكسكس ليك نظام في زول نازل و بعد داك لو الراكبين بنات الرجال بقيفوا ليهم و لو الراكبين رجال يشمعوا

المعلومات العامة

أخطر بتاع حركة في العربي منو؟

بقولوا ليو سلفاكير يا معلم .. و دا لو نقشتوا ليك من بعيد بديك إشارة تبقا مارق طوالي ولا ركاب ولا حاجة

الكمسنجي الماسك نمرة الحج يوسف منو؟

حافظ يا عمك ياخ و دا شان تهرب منو خش النمرة مع بتاع الهايس .. عشان هو حيطمع في بتاع الهايس و يكورك ليوا و الباقي علي انا

كيف تتعامل مع بتاع حركة قيضنا مخالفين؟

اول شي شوفوا لو زول مولانا .. دا أقنع و أديوا حق الإيصال ساي

لو زول كول, حنك ساي, ما نفع جريدة الليلة بتمرقنا, لو ما نفع السجارة ولا السفة طرف الجيب*(2) .. دا كولوا ما خارجنا مافي حل غير أدردما صغيرة *(3) و نبقا مارقين هههه

الفكة بيجيبا من وين؟
في كم واحد من الشحادين المحتالين ديل معارف كدا … بجازفوا ليك منهم

اي كلمة أخيرة تحب تقولا
يا معلم نحن ما بتاعين كلامات نحن بنسوقا من غير كلتش و بنلفها من غير دركسون

خلاس يا ولدنا .. اكتب لي تلفونك و عنواك و ناس الإتش أر بضربوا ليك لو جاك القبول

مع السلامة

الله يسلمك

ثم نادي المعلم بصوت عالي: البعدواااا

السلااااااااام عليكم يااا معلم , معاك أحمد عزالدين عبدالغني الشهير بالأفغاني ههههههه

و بعد يوم من المعاينة تلفون يضرب للسواق
السلام عليكم يا معلم: معاك جنابوا عبدو قرش
مرحب حبابك يا جنابوا نعل مافي مشكلة ترخيص ولا ايصال نحن أمورنا كلها واضح
لالا بس عندنا ولدنا كدا جايي من طرف الملازم اول و كدا.. و عايز ليو شغل يمشي بيهوا الأمور
لالا كان كدا تب يا جنابوا مكانوووو محجوووووووووز يجي يستلم الباب من بكرة و الحلاوة عليكم هههههه

   (1)

البقرة: مصطلح يطبق على الحافبة الروزا و أيضاَ يطلق علي الخمسين جنيه الصمة

(2)

بعض أهل العلم تكلموا عن حرمة السجائر و الصعود بإعتبارها مضرة بالصحة

(3)

دردما صغيرة عبارة يقصد بها ان تخصص مبلغا صغيراً من المال للشخص المعني و ذلك للخروج من مأوق ما … و الرشوة محرمة يا جماعة صح؟؟؟

(4)

أحب أوجه رسالة للناس الفاكرة انو الكماسرة و بتاعين الحركة و غيرهم ممن بشغاون مثل هذه الوظائف , الفاكرة انهم ناس كلام فاضي ساي .. لالا النطرة دي ما صاح , قبل فترة لاقاني يتاع حركة اتكلم معاي انجليزي جد .. الدنيا صغيرة و متقلية يوم الناس فوق و يوم الناس تحن و مافي داعي ترفعوا قزقزكم !!!! و طبتم 🙂 هههههه

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s